Feijoa
Feijoa | |
---|---|
![]() ![]() | |
Sailkapen zientifikoa | |
Erreinua | Plantae |
Ordena | Myrtales |
Familia | Myrtaceae |
Leinua | Myrteae |
Generoa | Acca |
Espeziea | Acca sellowiana Burret, 1941 |
Datu orokorrak | |
Gizakiak ateratzen dizkion produktuak | Feijoa fruit (en) ![]() |
Feijoa (Acca sellowiana) jatorriz Brasilgoa den espezie botaniko bat da. Brasildik Kolonbiara, Uruguaira eta Argentinara hedatu zen. Hotzari eutsi egiten dio baina ez -5 °C azpitik; tenperatura altuak ez ditu jasaten, ezta lehortasuna ere. Gaur egun ekoizpen handiena duten herrialdeak Kolonbia eta Zeelanda Berria dira[1].
Fruitu jangarria ematen du. Otto Karl Berg alemaniarrak João da Silva Feijoren omenez eman zion izena fruituari[2].
Deskribapena
Landarea
4 metroko altuera hartu dezakeen zuhaixka oso adarkatu bat da. Espezie monoikoa da. Enborraren azala gris argia da, latza eta ezkatatsua. Adaxkak oso zurrunak dira. Landare hostoiraunkorra da.
Hosto sinple oposatuak eta peziolatuak ditu, itxuraz oboideak edo eliptikoak, berde ilunak gainaldean, eta zurixkak azpialdean. 4-8 milimetroko luzera dute.
Loreak hermafroditak dira, lau petalo zuri-arrosa eta lau sepalo dituztenak. Estaminetako anterak hori biziak edo gorriak dira, eta nahiko luzeak; horregatik, landare apaingarritzat ere erabiltzen da feijoa. Txoriek eta intsektuek polinizatzen dute, erleek batez ere.
Fruitua
Fruitua baia jangarri bat da. Obalatu samarra da, luzeran 4-7 cm eta zabaleran 3-5 cm[3]. Kanpotik, azala berdea du, eta barrutik zurixka da mamia, erdian gelatina bezalakoa izanik. C bitaminan aberatsa da, eta zapore mamitsua eta gozoa du. Fruitua emateko beharrezkoa du klima freskoa. Fruitua udazkenean heltzen da.
Erreferentziak
- ↑ (Ingelesez) Hunt, Elle. (2017-05-13). «Falling for feijoas: the fruit New Zealand wants the world to love» The Guardian ISSN 0261-3077. (Noiz kontsultatua: 2023-05-19).
- ↑ «Tropicos | Name - Acca O. Berg» legacy.tropicos.org (Noiz kontsultatua: 2023-05-19).
- ↑ (Ingelesez) ANV, Redaccion. (2022-08-11). «Feijoa, una fruta verde llena de virtudes» ActualFruVeg (Noiz kontsultatua: 2023-05-19).
Kanpo estekak
Datuak: Q499671
Multimedia: Feijoa sellowiana / Q499671
Espezieak: Acca sellowiana