Granada Club de Fútbol futbol talde andaluziarra da, 1931an Granada hirian sortutakoa. Etxeko partiduak Nuevo Los Cármenes estadioan jokatzen ditu.
Historia
Nuevo Los Cármenes futbol zelaia.Eibar KE-ren aurkako partida, lehen mailan.Alhaurinen zelaian hirugarren mailako partida, 2005ean.
Sorrera eta hasierako urteak
1931eko apirilaren 6ean eratu zen Club Recreativo Granada taldea. Berehala irabazi zuen bere lehenengo txapelketa, 1933ko Andaluziako Kopa hain zuen ere. Gerra Zibila bukatzean bigarren mailan sartua izan zen eta berahala lehen mailara igotzea lortu zuen, 1940-41ean hain zuzen ere. Lau urte eman zituen gainera goiko mailan.
Lehen mailako urteak
Hamabi urte bigarren mailan egin ondoren berriz ere lehen mailara lortzea lortu zuen 1956-57 denboraldian bigarren mailako txapeldun gelditzean eta 1959an Errege Kopako finalista izan zen. Bartzelonak 4-1 irabazi zion finalean.
Titulurik irabazi ez arren lehen mailako ohiko taldea bihurtu zen Granada 1965ean hirugarren igoera lortu ondoren. Batez ere 1968 eta 1976 artean zortzi denboraldiz jarraian mantendu baitzen bertan. Posturik onena 6.a izan zuen 1971-1972 eta 1973-1974 denboraldietan.
Hiru hamarkada putzu sakonean
Klubak 50 urteurrena betetzen zuen urtean 2.B mailara jeitsi zen Granada eta bertan urte mordoxka bat egin ditu. 2002an gainera diru arazoak zirela eta hirugarren mailara ere jeitsi zen.
Berpizkundea
2009-10 urtean 2.B mailatik ateratzeko talde indartsua osatu zuen eta bigarren mailarako igoera lortu zuen. Hurrengo urtean Ligan 5. sailkatu zen, baina urte hartan igoera sistema aldatu zen, izan ere lehenengo bi sailkatuak zuzenean igotzen baziren ere 3 eta 6. postuen artean zeudenek ligaxka bat jokatu behar zuten eta ligaxka hori irabaztea lortu zuenez Granadak berriz ere lehen mailara igotzea lortu zuen.
2011-12 denboraldian lehen mailan aritu zen eta mantentzea lortu zuen azken jardunaldiko 87. minutuan Atlético Madrileko Falcaok Vila-Reali sarturiko gol bati esker. Hurrengo denboraldian jeitsiera postutatik kanpora mantendu zen eta 15. postua eskuratu zuen azkenean. 2013-14 denboralditik aurrera azken jardunaldian salbatu da. 2016-17an azken postuetan egon zen denboraldi guztian eta gabonetan fitxaketa ugari egin arren azken postuan amaitu zuen.
2019an berriz itzuli zen lehen mailara. Denboraldiko lehen itzulia bikaina egin zuen eta Errege Kopan finalerdietara iritsi zen 51 urte beranduago, baina Athleticek kanporatu egin zuen kanpoko golaren balioagatik. Azken jardunaldian ordea Athletici 4-0 irabazi eta zazpigarren postuan kokatu zenez historian aurreneko aldiz Europako txapelketetarako sailkatu zen. Hurrengo denboraldian maila galdu zuen.
2023an berriz igo zen baina urtebeterako soilik.
Uniformea
Taldeak hasiera batean marra zuri urdindun elastikoa izan zuen. Gerra Zibila amaitu ondoren kolore bereko elastikoak aurkitu ez eta Madrilgo Saltoki Handi batzuetan elastiko zuri-gorriak erosi zituzten. 1960. hamarkadan gainerako taldeetatik bereiztu asmoz marra horizontalak zituzten kamisetak hartu zituzten. Ordutik aurrera bertikalak eta horizontalak txandakatu zituzten baina 2005ean egindako asanblada batean marra horizontalak finkatzea erabaki zen.
Historikoa
1931
1939-1954
1960
Azken urteak
2018-2019
2019-2020
2020-2021
2021-2022
2022-2023
2023-2024
Datuak
2023-24 barne:
Denboraldiak 1. mailan: 27
Denboraldiak 2. mailan: 34
Denboraldiak 2. B mailan: 22
Denboraldiak 3. mailan: 5
Ligako posturik onena: 6.a Lehen mailan (1971-72, 1973-74)